မြန်မာ့သမိုင်း (MYANMAR HISTORYS): May 2018

#စစ်သူကြီး မဟာဗန္ဓုလ#
မြန်မာနိုင်ငံတွင် စစ်သူကြီးများ ရှိသည့်အနက် အမြော်အမြင် ရှိခြင်း ၊ ရဲရင့်ခြင်း ၊ လုံ့လဝီရိယ ရှိခြင်း ၊ မြင့်မြတ်သော နှလုံးထားရှိခြင်း တို့တွင် သူထက်လွန်သော မဟာဗန္ဓုလ စစ်သူကြီး အကြောင်းတို့ကို မကျဉ်းမကျယ် ဖော်ပြပေအံ့။
အထက်မြန်မာနိုင်ငံ အောက်ချင်းတွင်းနယ် တပယင်းတွင် (ငပယင်းလည်း ဟူ၏) လယ်ယာကိုင်းကျွန်း လုပ် ကိုင်စားသောက်ရ၍ ပစ္စည်းဥစ္စာ ချို့တဲ့ရှာသော ဦးပေါက်တော ၊ မယ်မိငြိမ်တို့မှ မောင်ရစ် ၊ မောင်အေး ၊ မယ်ဒုတ် ၊ မောင်မြတ်နေ တို့ကို မွေးဖွားရာ မောင်ရစ်ကား နောင်အခါ မဟာဗန္ဓုလ စစ်သူကြီးဟု ထင်ရှားကျော်စောသူ ဖြစ်လာလေသည်။
မောင်ရစ်၏ ဖွားသက္ကရာဇ်ကား ၁၁၄၄ ခု ၊ တန်ဆောင်မုန်းလဆန်း ၂ ရက် ၊ တနင်္လာနေ့ နံနက် တစ်ချက် တီးအချိန် ဖြစ်သည်။
ရန်ကုန်မြို့ ကွယ်လွန်သူ ဗေဒင်ဆရာ ဦးထွန်းငြိမ်းထံမှ ရသော ဇာတာပုံအရဖြင့် ကန်တွင် ၁-၂-၃-၆ ၊ တူ တွင် ၄ လ ၊ ဗြိစ္ဆာတွင် -၀ ၊ ဓနုတွင် - ၅ ၊ မိန်တွင် - ၈ တည်နေလေသည်။
ထိုဗေဒင်ကိန်းအရ မည်သည့် နေရာမဆို ပြုလုပ်ဆောင်ရွက်လျှင် ထူးထူးချွန်ချွန် သူများထက် ကဲလွန်အောင် ကောင်းသည့်နေရာ၌ လည်းကောင်း ၊ ဆိုးသည့်နေရာ၌ လည်းကောင်း ပြုတတ်၏။ အလွန် ထက် မြက် သော စိတ်လည်း ရှိတတ်၏။
မောင်ရစ် ၁၃ နှစ်ကျော်ခန့်တွင် ဖခင် အနိစ္စရောက်လေရာ ဤလူမမည်သည် သားကြီးဖြစ်သည့်အလျောက် အမိ မုဆိုးမနှင့် ညီငယ် နှမငယ် များကို မိမိပင်လျင် ပင်ပန်းကြီးစွာ လုပ်ကိုင်ရှာဖွေ ကျွေးမွေးရ၏။ အမိကို အလွန်ရိုသေ၏။
အရွယ်ရောက်သော် အိမ်ထောင်ပြု၏။ ရှေးရှေး နှောင်းနှောင်း ယူသော မယားများကား မယ်ဟေမံ ၊ ရှင်မင်းဘူး ၊ မယ်သီလ သုံးယောက် ရှိကြောင်း သိရသည်။
မယ်ဟေမံမှ မအိုဘူး ၊ မကြီးဘူး သမီးနှစ်ယောက် မွေးသည်။ ရှင်မင်းဘူးမှ မောင်ကျန်ကြီးကို ဖွားသည်။ မယ်သီလမှ မရွှေစု ၊ မတုတ်တုတ် ၊ ဦးကြီး (ဦးမောင်ကြီး) ၊ ဦးချုံ ၊ ခင်ချစ်မယ် တို့ကို ဖွားသည်။
မစ္စတာကောက် ရေးသော ရာဇဝင်ဖတ်စာမှ ရသော ဓာတ်ပုံအရ ဦးမောင်ကြီးမှာ တပယင်းမင်းကြီး ဖြစ်သည်။ ကောလင်းမင်းသား၏ မြေး ဦးမောင်မောင်တင် မှတ်တမ်းအရ ဦးချုံမှာ တပယင်းဝန် ဖြစ်သည်။ ခင်ချစ်မယ်မှာ မင်းတုန်းမင်း တရားကြီး၏ ညီတော် အိမ်ရှေ့မင်း (ကနောင်မင်း)၏ ကိုယ်လုပ်တော် ဖြစ်သည်။
မောင်ရစ်သည် အကြမ်းအတမ်းဘက် ၊ စစ်ဘက်၌ ဝါသနာပါ၍ ဘိုးတော် ဦးဝိုင်း၏မြေး အိမ်ရှေ့မင်း စစ်ကိုင်း မင်းထံမှာ ကိုယ်ရံတော်တပ်သား အဖြစ်နှင့် ဝင်ရောက် ထမ်းရွက်လေသည်။ ဤသို့ ထမ်းရွက်နေစဉ် ဓားရေး ၊ လှံရေး တို့၌ များစွာလေ့လာလျက် အရှင့်အမှုတော်ကို သက်စွန့် ကြိုးပမ်းထမ်းရွက် ၊ ရဲရဲရင့်ရင့် ရက်ရက်စက်စက် ပြုတတ်သောကြောင့် အိမ်ရှေ့မင်း အိမ်တော်ကို ဘီလူးစောင့်သည်ဟု လူတို့ ဆိုစမှတ် ပြုကြကုန်သည်။
အိမ်ရှေ့မင်း စစ်ကိုင်းမင်းသည် ၁၁၈၁ ခု၌ နန်းတက်ရ၏။ နောင်အခါ ဘကြီးတော် ဟုတွင်သည်။ မောင်ရစ်မှာ အိမ်တော်ပါကျွန် ဖြစ်၏။ အမှုတော်ကို သက်စွန့်ကြိုးပမ်း ထမ်းပါသော်လည်း ပေါ်ပေါ်ထင်ထင် မရှိ ၊ အချီးအမြှောက် မခံခဲ့ရလေ။ ယခု မိမိအရှင် ဘုရင်အဖြစ်၌ ထင်ပေါ် အချီးအမြှောက်ခံရအောင် ပြုအံ့ဟု တစ်နေ့ ညီလာခံ၌ မိမိနှင့်အတူ ခစားနေသော နန္ဒဗလ အမည်ရှိသော မင်းချင်းငယ် တစ်ယောက်ကို အကြောင်း တစ်စုံတစ်ရာ မရှိဘဲ ရုတ်တရက်ထ၍ ထောင်းထုလေ၏။
ထိုအခါ မောင်ရစ်ကို ဖမ်းဆီး၍ ၎င်း၏ ထူးခြားသော အမူအရာကို စစ်ဆေးလေ၏။ လျှောက်သည်ကား " မှန်လှပါ ၊ ထားလျှင်လည်း ရှင်ရမည် ၊ သတ်လျှင်လည်း သေရမည် ၊ ကျွန်တော်မျိုးသည် အမှုတော်ကို သက် စွန့်ကြိုးပမ်း ထမ်းရွက်လာသည်မှာ ကြာလှပါပြီ ဖြစ်သော်လည်း ထင်ထင်ပေါ်ပေါ် မရှိ ၊ အချီးအမြှောက် မခံရပါ သောကြောင့် အရှင့်ရှေ့တော်၌ ထင်ပေါ်လို၍ ဤသို့ပြုမူခြင်း ဖြစ်ပါကြောင်း လျှောက်ဝံ့ပါသည် ဘုရား " ဟု ရဲဝံ့စွာ လျှောက်လေ၏။
ဘကြီးတော်လည်း များစွာနှစ်သက် သဘောကျတော်မူ၍ သံတော်ဆင့် အရာကို ပေးတော်မူသည်။ ထိုအခါ အသက် ၃၇ နှစ်ရှိပြီ။
ထို့နောက် မကြာမီ အလုံဝန် ခန့်တော်မူသည်။
၁၁၈၁ ခုတွင် မဏိပူရ မကျိုးနွံ၍ ဤအလုံမြို့ဝန်ကို ကြီးကြပ်စေလွှတ် တိုက်ခိုက်စေ၏။ အမှုတော်ကို နာမည်ရလောက်အောင် ကျေပွန် ချောမောစွာ ဆောင်ရွက်ခဲ့၍ ပြန်ရောက်သောအခါ ' မဟာဗန္ဓုလ ' ဟူသော ဘွဲ့ကို ရလေသည်။
၁၁၈၃ ခုတွင် အာသံစော်ဘွား မကျိုးနွံ၍ မဟာဗန္ဓုလကို စေလွှတ်နှိမ်နင်းစေသည်။ စော်ဘွားကို နန်းချနှင်ထုတ် ၊ အာသံကို သိမ်းလေသည်။ ၁၁၈၄ ခုတွင် ပြန်ရောက်ပြီးနောက် အဂ္ဂမဟာ သေနာပတိဝန်ကြီး ခန့်တော်မူသည်။
၁၁၈၅ ခု ရခိုင်ပြည် ရှင်မဖြူကျွန်းသို့ စစ်တကောင်းတို့ လာရောက် အလံစိုက်သည်ကို နုတ်ပစ်မှုကစ၍ အင်္ဂလိပ်တို့နှင့် အချင်းဖြစ်ပွားရာ ဘင်္ဂလားအထိ သိမ်းပိုက်ရန် မဟာဗန္ဓုလ ကြီးမှူး၍ ရခိုင်သို့ ချီရသည်။ ဤသို့ချီစဉ်က ' ဗိုလ်မှူးဝန်ကြီး သတိုးမင်းကြီး မဟာဗန္ဓုလ ' ဟု ဘွဲ့တပ်တော်မူသည်။
ရောက်ပြီးနောက် ဂေါ်တော့ပလ္လင်အထိချီ၍ တိုက်ခိုက် စစ်ရေးသာနေလေသည်။ ဤအတောအတွင်း အင်္ဂလိပ်တို့က ရန်ကုန်သို့ ပင်လယ်လမ်းက လှည့်သွား၍ တိုက်ခိုက် သိမ်းယူလေသဖြင့် အထက်သို့ မတက်နိုင် အောင် ကာကွယ်နိုင်ရန် အမိန့်တော်နှင့် ပြန်ခေါ်သောကြောင့် မဟာဗန္ဓုလ ပြန်လာရလေ၏။
ဤသို့ တပ်ပြန်၍ သိမ်းခဲ့ရာ၌ မလွယ်ကူချေ။ တပ်ကို အစုစုခွဲ၍ ဧရာဝတီသို့အရောက် တစ်လမ်းစီ လာကြပြီးသော် ဓနုဖြူ၌ဆုံရန် အမိန့်ပေး ခဲ့၏။ လမ်း၌ လူအသေအပျောက် အလွန်များပြားစွာ၏။
ဤသို့ ပြန်ရောက်ကြသော် ၁၁၈၆ ခု ၊ ကဆုန်လတွင် ရန်ကုန် ကြည့်မြင်တိုင် (ကြေးမြင်တိုင် ဟု ရှိသင့်သည်) တို့၌ လာရောက် တိုက်ခိုက်ကြ ရ၏။ အင်္ဂလိပ်များက ရွှေတိဂုံကုန်းတော်ကို အခြေပြု၍ တိုက်၏။ ထိုသက္ကရာဇ် တော်သလင်းလပ ဘုရင်က ပြန်ခေါ်၍ ' သတိုးသုဓမ္မ မဟာဗန္ဓုလ ' ဘွဲ့တော်နှင့် စစ်သူကြီး အရာကို ထပ်မံချီးမြှင့်၍ စစ်တောင်းမြို့ကို ပေးတော်မူသည်။ နောက် ရန်ကုန်သို့ ပြန်လာရ၏။

ထိုသက္ကရာဇ် ပြာသိုလတွင် မြန်မာတို့ အရေးနိမ့်၍ ရန်ကုန်က ခွာပြီးလျှင် ဓနုဖြူသို့ ရွှေ့ခဲ့ရ၏။ ဓနုဖြူသို့ရောက်သော် ကြီးကျယ်ခိုင်ခံ့သော ခံတပ်များကို နှစ်လတိတိ ဆောက်တည် ပြင်ဆင်လျက် နေ၏။ ဤအခါ မြန်မာတို့မှာ စစ်သား ၁၀,၀၀၀ ကျော်လောက်သာ ရှိတော့သည်။

အင်္ဂလိပ်တို့က ခံတပ်မြောက်ဘက်တွင် တပ်စွဲနေ၏။ အင်္ဂလိပ်ရေတပ်ကမူကား ဓနုဖြူအောက်နားက ကျောက်ချနေ၏။
၁၁၈၆ ခု ၊ နှောင်းတန်ခူးလဆန်း ၁၄ ရက် (၁၈၂၅ ခု ၊ ဧပြီလ ၁ ရက်နေ့) နံနက်တွင် အင်္ဂလိပ်တပ်က ဗုံးအမြောက်ဖြင့် ကြဲပစ်လေသည်။ မြန်မာတို့က အတန်ငယ်သာ ပြန်၍ ပစ်ခတ်နိုင်လေတော့၏။ နံနက် ၉ နာရီလောက်တွင် ဗန္ဓုလသည် မိမိ ကြည့်ရှုစီမံနေကျအတိုင်း တပ်ကို လှည့်၍ ကြည့်ရှုလာရာ မျှော်စင်သို့ရောက် ၍ ခေတ္တထိုင်နားလျက် အချို့ ဗိုလ်မှူးတို့အား အမိန့်ပေးနေစဉ် အင်္ဂလိပ်တပ်မှ ဗုံးဆန်တစ်ခု အနားသို့ ကျရောက်ပေါက်ကွဲ ထိမှန်လေသဖြင့် ပွဲချင်းပြီး အနိစ္စရောက်လေ၏။

အလောင်းကို ချက်ချင်းသင်္ဂြီုဟ်လေသည်။ အရိုးကိုယူ၍ မလွန်တွင် အရိုးအိုးစေတီ တည်သည်ဟု အင်္ဂလိပ်တို့ မှတ်တမ်းတွင် တွေ့ရသည်။
စစ်သူကြီးကျလျှင် ညီ မင်းထင်မင်းခေါင်ကို အုပ်ချုပ်ရန် အပ်နှင်းကြသော်လည်း လက်မခံဘဲ ထွက်ပြေးသည်။ တပ်ကစဉ့်ကလျား ဖြစ်၍ ပျက်လေသည်နှင့် အင်္ဂလိပ်တို့က အလုံးစုံ သိမ်းလေသည်။ ထွက်ပြေးလာသော မင်းထင် မင်းခေါင် ကိုလည်း ဤသို့ ပြုရာသည်လောဟု ဘုရင်က ကွပ်မျက်လိုက်လေ၏။
ဤသို့လျှင် မဟာဗန္ဓုလသည် အသက် ၄၂ ကျော် ၄၃ နှစ်အတွင်း၌ အနိစ္စရောက်ရလေသည်။ အရပ်မြင့်မြင့် ၊ နားထင်ကျယ်ကျယ် ၊ အချိုးအစား ကျန၍ သန်စွမ်းသန်မာသည်။
အသား အတန်ပင် ညိုသည်။ မျက်စိ စပါးကြည့် ရှိသည်။ စစ်ကိုင်းမင်းထံ ခစားစဉ်က ' မောင်မင်းမျက်စိ စောင်းယောင်တကား ' ဟု မိန့်တော် မူသည်ကို " မှန်ပါ ၊ သည်မျက်စိမျိုးမှ တိုင်းပြည်ကို ကြည့်နိုင်ပါသည် " ဟု ပြန်လျှောက်ဖူးသော ဟူ၏။
အရည်အချင်းနှင့် ပြည့်စုံစွာ၍ ဘွဲ့အမည်များစွာ ရသည်။
(၁) ငယ်မည် မောင်ရစ် ။
(၂) အသက် ၃၇ နှစ်တွင် ဗြဲတိုက်သံတော်ဆင့် ဖြစ်သည်။
(၃) နောက် အလုံမြို့ဝန် ဖြစ်သည်။
(၄) မဏိပူရကို အောင်ခဲ့၍ ပြန်လာသောအခါ ' မဟာဗန္ဓုလ ' ဘွဲ့ကို ရသည်။
(၅) အာသံကို နိုင်ခဲ့၍ အပြန်တွင် အဂ္ဂမဟာ သေနာပတိ ဝန်ကြီး ခန့်တော်မူသည်။
(၆) ရခိုင်သို့ ချီခါနီး၌ ' ဗိုလ်မှူးဝန်ကြီး သတိုးမင်းကြီး မဟာဗန္ဓုလ ' ဘွဲ့ ထပ်၍ရသည်။
(၇) နောက်ဆုံး အင်္ဂလိပ်နှင့် တိုက်နေစဉ် ' သတိုးသုဓမ္မ မဟာဗန္ဓုလ ' ဘွဲ့ စစ်သူကြီးအရာ စစ်တောင်းမြို့ တို့ကို ရသည်။

ဤစစ်သူကြီးမျိုး ရှားပေသည်။ ရိုသေသင့်သူကို ရိုသေ၍ ဝတ္တရားကို ကျေပွန်စွာ ဆောင်ရွက်လေ့ရှိ၏။ သစ္စာကြီး၏။ ဆင်းရဲနွမ်းပါးရှာသော အမိမုဆိုးမနှင့် ညီငယ်တို့ကို မိမိသည် သားကြီး ဖြစ်သည့်အတိုင်း အသက် ၁၃ နှစ် ၊ ၁၄ နှစ် ရွယ်ကပင်စ၍ ပင်ပန်းစွာ လုပ်ကျွေးခဲ့ရ၏။ အမိကို အထူးသဖြင့် ရိုသေ၏။ အမှုတော်ကို ထမ်းစဉ်ကလည်း ခိုကတ်ခြင်း မရှိ ၊ စိတ်ပါလက်ပါ အလွန်ကျေပွန် ကောင်းမွန်စွာ ဆောင်ရွက်ပေ၏။

ရဲရင့်ခြင်းလည်း ရှိ၏။ မိမိကိုယ်ကို ထင်ပေါ်စေလို၍ အခြား မင်းချင်းတစ်ယောက်ကို ထ၍ ထောင်းထုသည်မှာ သူရဲဘောနည်းသော သာမည လူတို့၏ ပြုမူခြင်း မဟုတ်ပေ။ မဏိပူရ ၊ အာသံ ၊ စစ်တကောင်း ၊ ရခိုင် ၊ ရန်ကုန် ၊ ဓနုဖြူ စစ်ပွဲတို့တွင် တွန့်ရွံ့ခြင်း မရှိ ၊ မိမိသာလျှင် ရှေ့က တက်လေ့ရှိ၏။
အချို့က ဗန္ဓုလ ရက်စက်သည်ဟု ပြောကြသည်။ ဤသို့ ရက်စက်သည်မှာ အလုပ်ဝတ္တရားကြောင့် လည်းကောင်း ၊ ခေတ်ကာလအလျောက် ဓလေ့ထုံးစံကြောင့် လည်းကောင်း ဖြစ်ရ၏။ ဝတ္တရား မကျေပွန်သော တပ်သားကို မိမိကိုယ်တိုင် တစ်ခါတစ်ရံ နှိပ်ကွပ်ခြင်း စသည်တို့မှာ စစ်သားတို့သည် နည်းစနစ်ကျန ၊ ဝတ္တရားမပျက် ကြိုးစားလေအောင် ဤသို့ပြုမှပင် ဖြစ်တော့မည့် ခေတ်အခါ ထုံးစံလည်း ရှိလေသည်။ အပြစ်အလျောက် နောက်လူတို့ သတိရစေရန် ပြုလုပ်ခြင်းလည်း ဖြစ်လေသည်။ သက်သက်စော်ကား မတရားပြုသည် မဟုတ်ပေ။
စင်စစ်သော်ကား ဤစစ်သူကြီး သဘောထားမသေးချေ။ ရန်ကုန်စစ်ပွဲ၌ အင်္ဂလိပ်တို့က မြန်မာသုံ့ပန်းများကို ဆေးရုံတွင်ထား၍ ကောင်းစွာ ပြုစုကုမသည်ဟု ကြားလျှင် အင်္ဂလိပ် သုံ့ပန်းများကို ညှဉ်းဆဲကလူ မပြုဘဲ ကောင်းစွာ ကုသကြည့်ရှုရန် ဗန္ဓုလက အမိန့်ပေးလေသည်။
ဓနုဖြူတွင် အရေးပျက်ရသည်မှာ အကြောင်းမညီညွတ် အခွင့်မသာသောကြောင့် ဖြစ်ရသည်။ အထက်က စစ်ကူများလည်း မရောက် ၊ ရခိုင် ၊ စစ်တကောင်း ကတစ်ဆင့် ကူးခဲ့ရသဖြင့် စစ်သည်များ အလွန်ပန်းနေလေပြီ။ စစ်သည် အရေအတွက်မှာလည်း များစွာ လျော့သွားလေပြီ။ တစ်ဖန် မြစ်ကျဉ်းသောနေရာက ခံတပ်မပြုဘဲ မြစ်ကျယ်သောနေရာက ခံတပ်ပြုမိလေသည်။ ဤသည်တို့ကြောင့် အရေးမလှ ရှိရသည်။

တစ်ကြောင်းလည်း ဗန္ဓုလ ကျဆုံးရခြင်းမှာ ရေတိမ်တွင် နစ်သကဲ့သို့ ရှိသည်။ တပ်ကို လှည့်လည်ကြည်ရှုနေစဉ် ဗုံးထိ၍ ရုတ်တရက် ကျဆုံးရသည်။ မကျရှုံးပါမူကား မနိုင်သော်လည်း မရှုံးဟု ထင်ဖွယ်ရှိသည်။

အထူးသဖြင့် ထိုနောက်ဆုံးအချိန်၌ ကျွန်ုပ်တို့၏ စစ်သူကြီးသည် မည်ကဲ့သို့ သဘောထား မြင့်မြတ်ပုံ ၊ မည်ကဲ့သို့ မြွက်ဆိုသွားပုံများကို အောက်တွင်ပါသည့်အတိုင်း မှတ်သားသတိပြုရာသည်။

" ငါတို့မှာ အကြောင်းမညီညွတ်သဖြင့် အရေးတို့သည် ပျက်ယောင်တကား။ သို့ပင်ဖြစ်စေကာမူ ငါတို့သည် သတ္တိကိုလည်းကောင်း ၊ ဝီရိယကို လည်းကောင်း မလျှော့အပ်ချေ။ မြန်မာတို့၏ ဂုဏ်ကို ငါတို့ ဆယ်ရမည်။ ထိုမှတစ်ပါးလည်း မြန်မာပြည်ဖွား စစ်သူကြီးသည် သေသင့်သည့် နေရာ၌ မတွန့်တို သေ၀ံ့ခဲ့ကြောင်းကို ငါတို့သည် ထင်ရှားစေအံ့ "

" တစ်ကြောင်းလည်း စစ်သူကြီးရှိလျက် အရေးပျက်သော် ရာဇဝင်ညှိုးရာသည်။ စစ်သူကြီး ကျဆုံး၍ အရေးပျက်သော်ကား မြန်မာတို့ကို လည်းကောင်း ၊ အသင်စစ်သားတို့ကို လည်းကောင်း အပြစ်ဆိုကြလိမ့်မည် မဟုတ်။ အပြစ်ဆိုဖွယ်ရာလည်း မရှိတော့ချေ။ သို့ကြောင့် ငါသည် မြန်မာနိုင်ငံ၏ ဂုဏ်ကို ဆယ်ခဲ့ပေအံ့ ၊ အမွမ်းလည်း တင်ခဲ့အံ့။ အသင်တို့လည်း ယခု ငါ စွန့်စားသကဲ့သို့ ရဲရင့်တည်ကြည်စွာနှင့် အရေးအရာ ရှိက မတွန့်မတို စွန့်စားကြရန် ငါသည် လက်ငင်းအမှန် ပုံစံပြခဲ့ပေတော့အံ့။ လိုက်နာကြပါကုန်လော့ " ဟု စိတ်ထားဖြင့် လည်းကောင်း ၊ ပြောဆိုခြင်းဖြင့် လည်းကောင်း ၊ ပြုမူခြင်းဖြင့် လည်းကောင်း အသက်ကို စွန့်လျက် အဓွန့်ကြာရှည် အမြဲတည်အောင် ဤမြန်မာပြည်၏ အကျိုးကို သယ်ပိုးဆောင်ရွက်သွားခဲ့ ရှာလေသတည်း။

စစ်သူကြီး မဟာဗန္ဓုလဘွဲ့လေးချိုးကြီး
(စာဆိုတော် ဦးမင်း ရေးစပ်သည်။)

တောင်ခပဲတင်မှ ၊ အောင်ပွဲတော်သစ်လို့ ၊ ကျော်ရစ်စေ ပေါ်ထွန်းတဲ့ မော်ကွန်းပုံ။
မြေမိုးငယ်စောင်းတောင် ၊ ဗိုလ်ခြေငယ်ဆောင်သည် ၊ အခေါင်သမ္ဘိန် ကျည်းနှင့် ကြိမ်ဟု ၊ ကလိင်္ကရာဇ်သို့ ၊ သည်စစ်ကို ဖြစ်ဖြစ်ကယ်ညက်ကျေ ၊ နန္ဒိသေလို ။ အောင်မြေသိဉာဏ် ၊ သူ့ထက်ကယ် သန်တော့တယ် ၊ ဆဒ္ဒန်ရ ကျိန်ဝင်မှာ ၊ ရုံးညာတင် သေနဂုတ်ပေမို့ ၊ ချုပ်တိုင်းအောင် ဖန်များပါဘိ ၊ ခြားသန့်တစ်ဂုဏ်။
ဆယ့်နှစ်ဖြာငယ် ၊ ဘင်္ဂါဘိလပ် ၊ ကာလကတ်ကို ၊ အမှတ်ကယ်နွံရုံ ၊ ချိုးခဲ့တုံမှ ၊ တိဂုံ ဒလ ၊ မုခ်သုံးဝမှာ ၊ မိစ္ဆာ့အယူ ၊ ကုလားဖြူကို ၊ လွယ်ကူသုံ့ပန်း ၊ ရွှေလက်ရ ဖမ်းမယ်လို့ ၊ အောင်ခန်းစံတည် ၊ မင်းဝံပြည်က ၊ ဇာနည်ကြီးနောင် ၊ ညာရုံးတော်ထောင်ဆဲမို့ ၊ အောင်ပွဲဘုံမှာ ၊ ဝသုန်မြေလေးလို့ ထူးပါဘိ။

ဒေဝါငယ်ဒေ၀ ၊ အာဠာဝကနှင့် ၊ ယက္ခကုမ္ဘဏ် ၊ အတန်တန်လည်း မာရ်ပုဏ္ဏက ၊ မျက်ရှိန်ပြက ၊ ကြောက်ရသောတွင် ၊ ရာတပြင်မှာ ၊ တိုက်ဆင်သန်ကြွား ၊ ခြောက်ဆယ်အားနှင့် ၊ ဗိုလ်များမြုတေ ၊ ပင်လယ်ဝေအောင် ၊ တက်နေနှုန်းတူ ၊ ရွှေဘုန်းတော်ကြူခိုက်မို့ ၊ ဇမ္ဗူတိုက်ခရိုင်မှာ ၊ စစ်မြေပိုင် ဘုရင့်သီးပေမို့ ထီးဓိပတိ။

မြန်မာ့ဂုဏ်ရည် ရာဇ၀င်ဖတ်စာ (ဦးဖိုးကျား)

Posted by မင်းအရိပ်

Credit To Tin Maung Hlaing

တောင်တန်းသာသနာပြု ဆရာတော် ဦးဥတ္တမသာရ

တောင်တန်းသာသနာပြုဆရာတော်ဦးဥတ္တမသာရ (သို့ )
မတ္တာဝိဟာရီ ဆရာတော်လောင်းလျာကို ၁၂၇၂ ခု၊ ပြာသို လပြည့်ကျော် ၁ ရက်၊ (၁၅ ဇန်န၀ါရီ ၁၉၁၁)တနင်္ဂနွေနေ့တွင် စစ်ကိုင်းတိုင်း အရာတော်မြို့နယ် ငွေတွင်းကုန်းကျေးရွာ တွင် ခမည်းတော် ဦးဘိုးညို မယ်တော်ဒေါ်သေးတာ မှ ဖွားမြင်ခဲ့သည်။၁၂၈၄ ခုနှစ်တွင် ရွာကျောင်း ဆရာတော် ဘဒ္ဒန္တဝိလာသကို ဥပဇ္ဈာယ် ပြု၍ မိဘ နှစ်ပါး တို့၏ ပစ္စယာ နုဂ္ဂဟဖြင့် ရှင်သာမဏေ အဖြစ် ရောက်တော် မူသည်။ ၁၂၉၂ ခုနှစ်၊ ငွေတွင်းကုန်းရွာ ကျောင်းဆရာတော် ဘဒ္ဒန္တဝိလာသကို ဥပဇ္ဈာယ် ပြု၍ ရဟန်း အဖြစ်သို့ ရောက်တော်မူသည်။

စာပေလေ့လာ ဘ၀မှာ

ဆရာတော်သည် မုံရွာမြို့ ရွှေသိမ်တော်တိုက်၊ မဟာ လယ်တီတိုက်၊ စစ်ကိုင်းတောင် မဟာ သမယချောင်၊ မန္တလေးမြို့ ချမ်းသာကြီး မြောက်တိုက်၊ အမရပူရမြို့ တူးမောင်းတိုက်၊ ပခုက္ကူမြို့ မဟာ ဝိသုတာ ရာမတိုက် ဆရာတော်များ ထံတွင် ပိဋကတ် ကျမ်းစာများ ကို တတ်စွမ်းသမျှ သင်ယူ ခဲ့သည်။ ရှေးခေတ်စာသင်နည်းအရ ကျမ်းကြီးပေါက် သင်ယူ တတ်မြောက် တော်မူခဲ့ပြီး အင်္ဂလိပ်စာ၊ ချင်းစာပေ၊ ချင်းဘာသာ စကား တို့ကိုလည်း လေ့လာ တတ်မြောက် ခဲ့သည်။ ရန်ကုန်တိုင်း ကမာရွတ် မြို့နယ် ဝါဆိုကျောင်းနှင့် လှိုင်မြို့နယ် အောင်ချမ်းသာ ကျောင်းတို့၌ စာဝါများ ပို့ချခဲ့သည်။

သာသနာပြုတို့ အတုယူစရာ

စာပေများ သင်ယူတတ်မြောက်ပြီး၍ သပိတ်တလုံး ပိုက်ကာ တောထွက်တော်မူခဲ့သည်၊ နှစ်ပေါင်း ၅၀ ကျော်ကာလပတ်လုံး ချင်းတောင်တန်းတလျောက် သာသနာပြုတော်မူပြီး ရံဖန် ရံခါမှသာ ပြည်မကြီးမှာ ဒကာဒကာမတို့ ပင့်လျောက်ချက်အရ ကြွေ၇ာက် ချီးမြှောက်တော်မူသည်၊

တဘ၀ ချုပ်ငြိမ်းချိန်

၁၃၅၇ ခုနှစ်၊ ပြာသိုလဆန်း ၇ရက် (၂၇၊ ၁၂၊ ၁၉၉၅) နေ့ ညနေ ( ၆း ၃၀) နာရီ အချိန်၌ သက်တော် ၈၆ နှစ်၊ သိက္ခာတော် ၆၆ ဝါ အရတွင် ချင်းပြည်နယ်၊ ဖလမ်း မြို့နယ်၊ လုံပီး ကျေးရွာမှ ရန်ကုန်မြို့သို့ ဆေးကုသမှု ခံယူရန် ကြွရောက်တော်မူစဉ် မန္တလေး လေဆိပ်မှာပင် တဘ၀ ချုပ်ငြိမ်းတော်မူခဲ့သည်။

ရေးသားခဲ့သော စာအုပ်များ
1. ကိုယ်တွေ့ မှတ်တမ်းများ - ၁၉၈၉ ခုနှစ်
2. ချမ်းမြေ့စွာ ဘဝ နေနည်း တရားတော် - ၁၉၈၉ ခုနှစ်
3. ဂုဏ်တော်ကွန်ချာ ပုတီး စိပ်နည်းများ - ၁၉၈၉ ခုနှစ်
4. ဆရာတော် အရှင် ဦးဥတ္တမသာရ၏ ကိုယ်တွေ့ မှတ်တမ်းများ - ၁၉၅၄ ခုနှစ်
5. တောင်တန်းတရား (ပထမတွဲ) - ၁၉၉၁ ခုနှစ်
6. တောင်တန်း သာသနာပြု ဆရာတော် ဦးဥတ္တမသာရ - ၁၉၉၄ ခုနှစ်
7. ပရိတ် မေတ္တာ တန်ခိုး ထက်စေသောနည်း - ၁၉၉၂ ခုနှစ်
8. ဘဝ တံခွန်အောင် လမ်းညွှန် တရားတော် - ၁၉၉၂ ခုနှစ်
9. ဘဝ အောင်မြင်ရေး လမ်းညွှန် ဒေသနာ - ၁၉၉၃ ခုနှစ်
10. ဘုန်ကြီးမှတ်စု - ၁၉၉၇ ခုနှစ်
11. မေတ္တာ စွမ်းအား လက်တွေ့ အကျိုးများ - ၁၉၉၄ ခုနှစ်
12. မေတ္တာရှင်ကြီး၏ မေတ္တာစာ - ၁၉၉၂ ခုနှစ်
13. ရဟန်း ဘဝ ချမ်းသာ (ပထမတွဲ) - ၁၉၉၂ ခုနှစ်
14. ရဟန်း ဘဝ ချမ်းသာ (ဒုတိယတွဲ) - ၁၉၉၃ ခုနှစ်
15. သံသရာဝဋ်ကို လွတ်အောင် ရုန်းကြစို့ရဲ့ - ၁၉၉၄ ခုနှစ်
စာစောင်အသီးသီးတွင် ရေးသားခဲ့သော ဓမ္မဆောင်းပါးများ
1. ကိုယ်က ဖန်တီး၍ သံသရာ ကျင်လည် နေကြသည်၊ ဗုဒ္ဓဓမ္မ လောက စာစောင် အတွဲ (၃၈) အမှတ် (၁၈) မှ (၂၁) အထိ
2. ချင်းစော်ဘွားကြီး ဦးဝမ်မှုံ၊ ဂျာနယ်ကျော် မဂ္ဂဇင်း (၂၉၊ ၁၁၊ ၁၉၃၇)
3. ချင်းတောင်တန်း သာသနာပြု၊ ဒဂုန် မဂ္ဂဇင်း (၅/ ၁၉၄၁)
4. တောင်တန်း သာသနာပြုရေး၊ ဒဂုန် မဂ္ဂဇင်း အတွဲ (၂၁) အမှတ် (၁) (၁၊ ၁၊ ၁၉၄၇)
5. တောင်အစဉ်စဉ် တောအထပ်ထပ် သာသနာ ရောင်ခြည် ထင်ဟပ်ခဲ့ပြီ၊ ဂျာနယ်ကျော် မဂ္ဂဇင်း အတွဲ
(၁၀) အမှတ် (၉) (၈၊ ၁၁၊ ၁၉၄၇)
6. ဒေသန္တရ ဗဟုသုတ ရှာမှီးကြရာ၌ ကြုံကြိုက်တတ်သော အခက်အခဲများ၊ တိုးတက်ရေး မဂ္ဂဇင်း အမှတ် (၉၃) (၆/၁၉၄၁)
7. နာဂ တောင်တန်းသားတို့၏ နောက်ကွယ်မှ ဤရက် ဤရွာများ၊ ဂျာနယ်ကျော်မဂ္ဂဇင်း (၂၂၊ ၂၊ ၁၉၄၇)
8. နှစ်ပြည်ထောင် အခြေကျ အလယ်က ကျောက်ဆောင် မျှော်လို့သာ မှန်းမိတော့ လွမ်းခမ်းငဲ့ ရစ်သီ၊ ဒဂုန် မဂ္ဂဇင်း အတွဲ (၂၁) အမှတ် (၇) (၇/၁၉၄၇)
9. နိဗ္ဗာန် ရလိုလျှင် သွားရောက်နည်း အဖုံဖုံရှိသည်၊ ဗုဒ္ဓဓမ္မ လောက စာစောင် အတွဲ (၃၀) အမှတ် (၁၄)
10. ဘုန်းကြီး ကျောင်းတိုက်များသည် လောက အယူဝါဒကို လိုက်နာ သင့်သလော၊ တိုးတက်ရေး မဂ္ဂဇင်း အမှတ် (၉၅) (၁၊ ၈၊ ၁၉၄၁)
11. မဏိပူရ နယ်ခြား တမူးမြို့၊ ဂျာနယ်ကျော် မဂ္ဂဇင်း (၁၀/၁၉၄၇)
12. မြေပေါက်လွတ် ဆွမ်းကျွေးတဲ့ ပွဲတဲ့၊ ဗုဒ္ဓဓမ္မ လောက စာစောင် အတွဲ (၁၃) အမှတ် (၃၆) မှ အမှတ် (၄၀) အထိ
13. မြို့တော် ဖလမ်း၊ ဒဂုန် မဂ္ဂဇင်း အတွဲ (၂၁) အမှတ် (၁၀) (၁၀၊ ၁၁၊ ၁၉၄၇)
14. မြို့တို့ ဌာနေ၊ တိုးတက်ရေး မဂ္ဂဇင်း အမှတ် (၈၈) (၁၊ ၁၊ ၁၉၄၁)
15. မြို့တော် ဘုတလင်၊ တိုးတက်ရေး မဂ္ဂဇင်း အမှတ် (၈၈) (၃၊ ၇၊ ၁၉၄၁)
16. ယဉ်ကျေးလာသော ချင်းတောင်၊ တိုးတက်ရေး မဂ္ဂဇင်း အမှတ် (၉) (ဧပြီလ)
17. ရွှေပြည်ဝင် စာတမ်း၊ တိုးတက်ရေး မဂ္ဂဇင်း အမှတ် (၈၄) (၃၊ ၉၊ ၁၉၄၀)
18. သာသနာပြု ပန္နက်စွဲရန် အကောင်းဆုံး ဌာနကြီး တခု၊ ဂျာနယ်ကျော် မဂ္ဂဇင်း (၁၃၊ ၉၊ ၁၉၄၇)
19. သာသနာ့ သူရဲကောင်းများ၊ ဂျာနယ်ကျော် မဂ္ဂဇင်း (၂၂၊ ၂၊ ၁၉၄၇)
20. အာသံပြည် သာသနာရေး၊ ဗုဒ္ဓဓမ္မ လောက စာစောင် အတွဲ (၉) အမှတ် (၁၀)
21. အယ်ဒီတာသို့ လွမ်းဖွယ် ချင်းဝိသေသတိုင်းမှ ပေးစာ၊ ဂျာနယ်ကျော် မဂ္ဂဇင်း (၁၃၀၉) ခုနှစ်၊

ချင်းတောင်တန်း ရဲ့ သခင်ကြီး

ချင်းတောင်တန်း တစ်ကြောလုံး မိုးမရွာတာကြာပြီ၊ ဘယ်လိုတွေဖြစ်နေပါလိမ့် --- --
ဒါဆို သခင်ကြီး လုပ်ထားတာပဲ ဖြစ်မယ် - လာ သွားကြစို့ သခင်ကြီးကို သွားပြောကြမယ် ---
ဒီနေ့ နေမပွင့်နိုင်လောက်အောင် မြူခိုးတွေ ပိတ်သဲနေတာပဲ၊ တောင်ယာ လုပ်ချင်တာတောင် လုပ်လို့ မရကြဘူး၊ မြူတွေ ဆိုင်းနေတာ သခင်ကြီး လုပ်ထားလို့ ဖြစ်မယ် --
လာ သွားကြစို့ရဲ့ သခင်ကြီးကို သွားပြောပြီး နေပူအောင် လုပ်ပေးခိုင်းကြမယ် -- -
ဒကာတို့-- ဒီနေ့ တောလိုက် မသွားကြပါနဲ့၊ အန္တရာယ်နဲ့ တိုးလိမ့်မယ်၊ သားကောင်လဲ ရမှာ မဟုတ်ဘူး၊

သခင်ကြီး -- -- ကယ်ပါအုံး - ဒီမှာ လူတယောက် တောဝက် အပက်ခံလိုက်ရလို့ပါ - --
အဲလို အဲလိုမျိုး ဒုက္ခအားလုံး တို့ရဲ့ ကယ်တင်ရှင်၊ ချင်းတမျိုးသားလုံးရဲ့ ကျေးဇူးရှင် ဗိုက်ကြီးသည် ကလေးမမွေးနိုင်တာက အစ လိုက်လံ ကူညီပေးခဲ့ရတဲ့ သခင်ကြီး ခေါ် တောင်တန်းဆရာတော်ကြီးရဲ့ ဘ၀ဟာ ခက်ခဲကြမ်းတမ်း ပင်ပန်းခဲ့ပါတယ်။

ဆောင်းတွင်းကာလရဲ့ တခုသော ညမှာတော့ ဆရာတော်ကြီး သီတင်းသုံးတဲ့ တောင်ပေါ်ကျောင်းဝင်းပြင်လေးထဲမှာ ကပ္ပိယချင်းဒကာတယောက်ရယ်၊ ဆရာတော်ကြီးရယ် မီးလှုံနေပါသတဲ့၊ ကျားတကောင်ကလည်း ချမ်းလွန်းလို့ ထင်ပါရဲ့ မီးပုံဘေးနားအထိ ရောက်လာပြီး ငြိမ်ဝပ်စွာ မီးလှုံနေတယ်၊ ဒီမှာတင် ချင်းဒကာက ကျားကြီးကို ကြည့်ကာ သတ်ပြီး ရောင်းစားလိုက်ရရင် ဘယ်လောက်ကောင်းလိုက်မလဲ လို့ စိတ်တွင်းက ကြံစည်ကာ အကုသိုလ်စိတ်များ ဖြစ်လာတာနဲ့ တပြိုင်နက်ထဲ ကျားကြီးဟာ အမှတ်မထင် ဟောက်လိုက်ပါသတဲ့၊

ဒီမှာတင် ဆရာတော်ဘုရားကြီးက --
ဒကာကြီးက သူ့ကို ရန်ပြုဖို့ ဘာကြောင့် စိတ်ကူးရတာလဲ ပါဏာတိပါတ ကို မလုပ်ရဘူးလေ -
တင်ပါ တပည့်တော် စောစောကတော့ ကြောက်နေတာပါ၊ နောက်တော့ သူက ရန်မပြုမှန်း သိတာကြောင့် အကုသိုလ်စိတ်တွေ ၀င်လာမိတာပါဘုရား -- ဟု လျောက်ထားသတဲ့၊

ချင်းတောင်တန်းက အတွေ့အကြုံများ
အသွားအလာ ခက်ခဲ၍ ဝေးလံ ခေါင်းပါးသော တောင်တန်း ဒေသ များတွင် နှစ်ပေါင်း ၅၀ မျှ သီတင်းသုံး နေထိုင်လျက် ဒေသခံ တိုင်းရင်းသား များအား ဗုဒ္ဓ တရားတော်များကို မျိုးစေ့ချ ပေးတော်မူခဲ့ပြီး အိန္ဒိယနိုင်ငံ အာသံ ပြည်နယ်၊ မဏိပူရ ပြည်နယ်နှင့် ဘင်္ဂလားဒေ့ရှ် နိုင်ငံ စစ်တကောင်း တောင်တန်း များနှင့် ဥရောပ နိုင်ငံများအထိ လှည့်လည့် သာသနာ ပြုတော် မူခဲ့သည်။

အထူးအားဖြင့် မေတ္တာအရာတွင် ကြီးမားတော်မူကာ သတ္တဝါတို့ အပေါ် နူးညံ့သော စိတ်ထားဖြင့် လက်နှိပ်ဓာတ်မီးမပါ နေ့ရော ညပါ ကြမ်းတမ်းသော တောတောင် ခရီးဝယ် တောင်ဝှေးတစ်ချောင်းဖြင့် ခဲခဲယဉ်းယဉ်း ပင်ပင်ပန်းပန်း သွားလာ၍ သာသနာ ပြုတော်မူခဲ့ပြီး အစားအသောက် ကအစ ချိုးခြံချွေတာကာ သာသနာပြုတော်မူခဲ့သည်၊

တနေ့တနေ့ ဘုန်းပေးစရာ မရှိ၍ ပိန်းဥပြုတ် ကန်စွန်းဥပြုတ်ဖြင့်လည်း ဆွမ်းတနပ် ပြီးတော်မူခဲ့ရသည်လည်း ရှိခဲ့၏။ ဒေသခံ ချင်းတိုင်းရင်းသားတို့သည်ကား ကိုးကွယ်ခံ တန်ခိုးရှင်ကြီးဟူ၍လည်းကောင်း၊ သခင်ကြီး ဟူ၍လည်းကောင်း ခေါ်ဝေါ်ကြကာ ချစ်ကြောက် ရိုသေလေးစားကြပေသည်၊ တခါတရံ ချမ်းအေးသော ဆောင်းတွင်းကာလ၀ယ် ထူထဲသော စောင်အထပ်ထပ် ခြုံထားသော်လည်း တောင်ပေါ်ကျောင်း၌ သီတင်းသုံးတော်မူသော သခင်ကြီး ကျောင်းသင်္ကန်းထက်မှ စောင်များကို ဖောက်ထွက်ကာ ထူးဆန်းသော အလင်းရောင်တန်းများ

ဖြာထွက်နေခြင်း၊ ကျောင်းသင်္ကန်းတခုလုံး လင်းထိန်နေခြင်း စသော ထူးဆန်းဖွယ်ရာများကို တောင်ခြေမှ ချင်း တိုင်းရင်းသား ဒကာ ဒကာမများ မကြာခဏ တွေ့မြင်ကြရသည် ဟု ဆရာတော်ကြီး၏ အထ္ထုပ္ပတ္တိ စာအုပ်တွင် ဖတ်ရှု့ရပေသည်၊ ထိုအတွက်ကြောင့်လည်း ဆရာတော်ကြီးအား မေတ္တာဝိဟာရီ ( မေတ္တာဖြင့် အမြဲမပြတ်နေလေ့ရှိသော ) မထေရ်ကြီး ဟူ၍ ရဟန်းရှင်လူ အများက လက်ခံ ကြည်ညိုခဲ့ကြ၇သည်။

အနည်းဆုံး တနှစ်တခေါက်အနေဖြင့် မြန်မာပြည် အလယ်ပိုင်း အောက်ပိုင်းဒေသများသို့ ကြွတော်မူကာ သက်တော်ကြီးရင့်တော်မူသည်အထိ ဒကာ ဒကာမတို့အား မေတ္တာဖြင့် ချီးမြောက်တော်မူခဲ့သည်။ ဆရာတော်ကြီး ပရိတ်ရွတ်တိုင်း တရားဟောတိုင်းမှာလဲ ရေအိုးရေခွက် ပုလင်း စသည်တို့၌ရှိသောေ၇များ ဆူဝေ လျံတက် လေ့ရှိသောကြောင့် ရေဆူဆရာတော် ဟုလည်း ကျော်ကြားတော်မူခဲ့ပေသည်။

လူဖြစ်လေရ၊ ဒုလ္လဘ၌
ဖြည့်ကြရောင်ဝါ၊ လထက်သာသည်၊
ပညာအလင်း ကိုယ်မှာဝင်းစေ၊
ဇင်မင်းဆယ်ဆ၊ မျှမကသည့်
စာဂအကျင့်၊ မွှေးသဖြင့်လျှင်၊
အခွင့်ထိုက်တန် နေရာမှန်၌
သက်ပန်ရာပြည့် တည်စေသတည်း။ ။
ဘ၀မှာ ထိုက်တန်စွာ ဘာဝနာ ပွားများအားထုတ် ထားသူအတွက် ကောင်းရာ သုဂတိ ရောက်စေဖို့ ဆုတောင်း ပေးနေစရာ မလိုတော့ပါဘူးလေ၊
တက္ကသိုလ်ဘုန်းနိုင်က သဇင်ပန်းကို တင်စားသလို စာရေးသူကလဲ ၁၃၅၇ ခုနှစ်၊ ပြာသိုလဆန်း ၇ရက် (၂၇၊ ၁၂၊ ၁၉၉၅) နေ့ ညနေ ( ၆း ၃၀) နာရီ အချိန်၌ သက်တော် ၈၆ နှစ်၊ သိက္ခာတော် ၆၆ ဝါ အရတွင် ချင်းပြည်နယ်၊ ဖလမ်း မြို့နယ်၊ လုံပီး ကျေးရွာမှ ရန်ကုန်မြို့သို့ ဆေးကုသမှု ခံယူရန် ကြွရောက်တော်မူစဉ် မန္တလေး လေဆိပ်မှာပင် တဘ၀ ချုပ်ငြိမ်းတော်မူခဲ့သော ဆရာတော်ကြီး၏ သီလ သမာဓိ ပညာဂုဏ်တို့ကို ပူဇော်သောအားဖြင့်ရေးသား ပူဇော်အပ်ပါသည်၊
Posted by ဓမ္မဂီရိ

Credit to TIN MAUNG HLAING

သမိုင်းထဲက မြန်မာ (၁) ကနောင်မင်းသား

ကနောင်မင်းကို ကနောင်မင်းသား(သို့) ကနောင်မင်းသားကြီးဟု ခေါ်ဝေါ်သုံးနှုန်းကြသည်က များသည်။ စင်စစ်အားဖြင့် မြန်မာ့နန်းတွင်းအခေါ်အဝေါ်အရဆိုလျှင် အိမ်ရှေ့မင်းဖြစ်သော ကနောင်ကို ကနောင်မင်းဟုသာ ခေါ်ရမည်ဖြစ်သည်။ မင်းသား (သို့)မင်းသားကြီး ဆိုသည်မှာ အိမ်ရှေ့မင်းထက် အဆင့်နိမ့်သည်။

ကနောင်မင်းသား(မြန်မာ ၁၁၈၁-၁၂၈၁) သည်မြန်မာနိုင်ငံ ကိုယ့်မင်းကိုယ်ချင်းဘ၀နှင့်နေစဉ်ကပင် နိုင်ငံတော်ကို ခေတ်သစ်နိုင်ငံတခု ဖြစ်မြောက်အောင်ကိုယ်ထိလက်ရောက် ကြိုးပမ်းခဲ့သည့် မြန်မာမင်းသားကြီး တစ်ပါး ဖြစ်သည်။ လူသုံးကုန်ပစ္စည်း ထုတ်လုပ်မှု နည်းစံနစ် ပြောင်းလဲခြင်းကို အကြောင်းပြု၍ လူ့သမိုင်းတွင် ခေတ်တစ်ခေတ်မှ အခြားခေတ်တစ်ခေတ်သို့ ပြောင်းလဲလာခဲ့ရသည်ဖြစ်ရာ မြန်မာနိုင်ငံတွင်လည်း ၁၉ ရာစု နှစ်များ အလယ်လောက်က ခေတ်ပြောင်းလဲခြင်းကို ဖန်တီးပေးသည့် အဖြစ် အပျက်များပေါ်ပေါက်ခဲ့လေသည်။

အောက်မြန်မာပြည်တွင်ဗြိတိသျှတို့ ရောက်ရှိ ကြီးစိုးလာခြင်း၊ ကိုယ့်မင်း ကိုယ်ချင်းနေသော မြန်မာနိုင်ငံ အထက်ပိုင်းသည် ထိုစဉ်အခါက တိုးတက်လျက်ရှိသော ဥရောပနိုင်ငံအချို့နှင့် ဆက်သွယ်မှုများ ရရှိလာခြင်း ကြောင့် လူသုံးကုန်ပစ္စည်း ထုတ်လုပ်မှု နည်းစနစ်တို့၏ အခြေခံဖြစ်သောအသစ်အဆန်း ထွင်မှုပြောင်းလဲမှုတို့သည် အထက် မြန်မာပြည်သို့ ရောက်ရှိလာကာ ခေတ်ကိုပြောင်းလဲစေနိုင်မည့်အခွင့်အလမ်းများ ပေါ်ပေါက်ခဲ့လေသည်။ ထိုအခွင့်အလမ်းများကို အမြင်ကျယ်စွာနှင့် အသုံးပြုကြသော ထိုခေတ်မြန်မာခေါင်းဆောင်တို့တွင် အရေး ပိုမိုပါဝင်ခဲ့သူကို ရှာဖွေလျှင်ကနောင်မင်းသားကြီးကိုပင် တွေ့ရပေမည်။
အတ္ထုပ္ပတ္တိ အကျဉ်း
ကုန်းဘောင်ခေတ် အမပူရ ဒုတိယမြို့တည် သာယာဝတီမင်း (၁၈၃၇-၁၈၄၆)နှင့် `သီရိသုစန္ဒာမာလာမဟေ´ဘွဲ့အမည်ရှိ ရွှေဘိုမင်းတရားကြီး၏ တောင်ဆောင်တော်၊ ကျောက်မော်မြို့စား မိဖုရားတို့တွင် သားတော်နှစ်ပါးတို့ ထွန်းကားခဲ့ရာ သားအကြီးမှာ ပဉ္စမသင်္ဂါယနာတင် မင်းတုန်းမင်း ဖြစ်၍ အငယ်မှာ သတိုးမင်းရဲကျော်ထင် ဘွဲ့ခံ ကနောင်မင်းသား ဖြစ်လေသည်။ ကနောင်မင်းသားသည် သက္ကရာဇ် ၁၁၈၁ ခုတော်သလင်း လပြည့်ကျော်၂ရက် တနင်္ဂနွေနေ့တွင် ဖွားမြင်၏။ ဖွားစဉ်က မီးနေဆောင်သို့မရောက်မီ တောင်ဆောင်၌ဖွားမြင်သဖြင့် ခမည်းတော်က မောင်တောင်မင်းဟု ကိုယ်တိုင်မှည့်ခေါ်ခဲ့၏။ ချစ်စနိူးခေါ်သော ငယ်မည်မှာ `ထိပ်တင်ကောက်´ ဖြစ်၍ မင်းသားလတ်အဆင့်တွင် မင်းတပ်မြို့ကိုစားခဲ့ရသည်။ နောင်တော်ပုဂံမင်း (၁၈၄၆-၁၈၅၃)ထီးနန်းဆက်ခံတော်မူသောအခါ `သီရိသုမဟာ ဓမ္မရာဇာ´ဟူသော ဘွဲ့တော်နှင့် ကနောင်မြို့ကို စားရသည်။ ထို့ကြောင့် ကနောင်မင်းဟု တွင်လေသည်။

သို့သော် ဒုတိယ အင်္ဂလိပ်-မြန်မာစစ်ပွဲတွင် ပုဂံမင်းအား နောင်တော် မင်းတုန်းမင်းကရွှေဘိုမှပုန်ကန်ရာတွင် အတူဦးဆောင်ပါဝင်ခဲ့သည်။ သက္ကရာဇ် ၁၂၁၄-ခုနှစ်၊ သက်တော် (၃၃)နှစ်တွင် ရွှေဘိုမင်းတရားကြီး၏ အနောက်နန်းတော် မိဖုရား (အနောက်နန်းမတော်မမြလေး)၏ သမီးတော် လှိုင်ထိပ်ခေါင်တင်နှင့် လက်ထပ်တော်မူပြီးလျှင် တပယင်း၊ တောင်တွင်းကြီး၊ ပဉ္စလငါးမြို့နှင့် စလေမြို့များကို စားရလေသည်။

ကနောင်မင်းသားသည် အိမ်ရှေ့စံမင်းသား (နန်းညွန့်နန်းလျာမင်းသား) လည်းဖြစ်ပြီး ထီးနန်းစည်းစိမ်နှင့် အချုပ်အခြာအာဏာကိုဆက်ခံရန်အခွင့်ရှိသူဖြစ်နေပေရာ ထိုအခွင့်အရေးကို မက်မောကြသော တူတော်များ (မြင်ကွန်းမင်းသားနှင့် မြင်းခုန်တိုင် မင်းသား) တို့၏လုပ်ကြံမှုကြောင့် ကံတော်ကုန်ခဲ့ရသည်။ ကနောင်မင်းသား ကံတော်ကုန်စဉ် သက်တော်မှာ (၄၇)နှစ်သာ ရှိသေးသည်။ ပဒေသရာဇ်ခေတ်ရှိ နန်းတွင်း အရေးအခင်းများမှာ သမိုင်းတင်ထားသည်ထက်လည်း ပိုမိုရှုပ်ထွေးနေတတ်သည်။
ကနောင်မင်းသားသည် သာယာဝတီမင်း၏ သားတော် ၊ မင်းတုန်းမင်း၏ ညီတော် ဖြစ်သည်။ ဒုတိယ အင်္ဂလိပ် - မြန်မာစစ် ပြီးဆုံးကာနီးတွင် မင်းတုန်းမင်းသားနှင့် ပူးပေါင်း၍ နောင်တော် ပုဂံမင်းကို ပုန်ကန် ခြားနားခဲ့ပြီး ၁၈၅၃ ၊ ဇူလိုင် (၁၁) တွင် မင်းတုန်းမင်း နန်းတက်ကာ ကနောင်မင်းသားက အိမ်ရှေ့မင်း ဖြစ်လာခဲ့သည်။ မင်းတုန်းမင်းကြီးသည် ဘာသာရေး ကိုင်းရှိုင်းသူ ဖြစ်ပြီး ကနောင် မင်းသားမှာမူ စီမံခန့်ခွဲရေးတွင် နိုင်နင်းသူ ဖြစ်သည်။ ကနောင်မင်းသားသည် အနောက်နိုင်ငံများသို့ ပညာတော်သင်များ စေလွှတ်၍ ဗမာ့တပ်မတော်ကို ခေတ်မှီစေရန် ခေတ်မှီ လက်နက်များ တပ်ဆင်နိုင်ရန် ကြိုးပမ်းခဲ့သည်။ စစ်လက်နက်များ ထုတ်လုပ်သည့် စက်ရုံများလည်း တည်ဆောက်ခဲ့သည်။ ကနောင်မင်းသားသည် ဧရာဝတီမြစ်ရိုးအတိုင်း ဆန်တက်လာမည့် ဗြိတိသျှတို့၏ စစ်သင်္ဘောများကို တားဆီးနိုင်ရန် ရေမြှုပ်ဗုံးကို တီထွင်စမ်းသပ် အောင်မြင်ခဲ့သည်။ သို့သော် ဘာသာတရား ကိုင်းရှိုင်းသည့် နိုင်ငံတော် ဖြစ်သည့် အားလျှော်စွာ ဘုန်းတော်ကြီးများက ရေသတ္တဝါများ သေကြေပျက်စီးကြောင်း ပြောကြား ကန့်ကွက်သဖြင့် ရေမြှုပ်ဗုံး ထုတ်လုပ်မှု စီမံကိန်းကို ရပ်တန့်ခဲ့ရသည်။ ထိုနည်းတူပင် အခြားသော စက်မှုထူထောင်ရေး ကြိုးပမ်းမှုများမှာလည်း ၄င်းကွယ်လွန်ပြီးချိန်မှ တစ်စစနှင့် ရပ်ဆိုင်းသွားခဲ့ရသည်။ အချို့စက်ရုံများကိုမူ အင်္ဂလိပ်တို့ မန္တလေးကို သိမ်းယူအပြီးနောက်ပိုင်းတွင် ပြန်လည်ပြီး လည်ပတ်ခဲ့ကြသေးသည်။

ကနောင်မင်းသားကို တိုင်းသူပြည်သားများက ချစ်ကြည်လေးစားကြပြီး မြင်ကွန်း မြင်းခုန်တိုင် အရေးအခင်းတွင် မင်းသားကြီးသာ လုပ်ကြံ မခံခဲ့ရပါက မြန်မာပြည် သည်နယ်ချဲ့လက်အောက်သို့ ဤမျှလောက်လွယ်ကူစွာ၊ စောစီးစွာ မရောက်နိုင်ဟု ယုံကြည်ကြသည်။[2]

ထိုစဉ်က အင်္ဂလိပ်နှင့် ပြင်သစ်စသည့် နိုင်ငံတို့က ကိုလိုနီနယ်မြေများရရှိရန် အပြိုင်အဆိုင် လုံးပမ်းနေကြခြင်းဖြစ်ရာ အထွေထွေ ခေတ်နောက်ကျနေသော ပဒေသရာဇ်နိုင်ငံများအဖို့ အနှေးနှင့်အမြန်သာကွာခြားပြီး နယ်ချဲ့လက်တွင်းသက်ဆင်းကြရန် တာစူနေပေသည်။ ကနောင်မင်းသားမှာ အချုပ်အခြာအာဏာ ပိုင်စိုးသူမဟုတ်သဖြင့် ကြိုတင်ပြင်ဆင်ကာကွယ်မှုများကို ဆောင်ရွက်ရာတွင် ကန့်သတ်ချုပ်ခြယ်မှုများ မလွတ်ကင်းသေးချေ။
ကနောင်မင်းသားသည် မိဖုရားနှင့် ကိုယ်လုပ်တော်ပေါင်း ၅၂-ပါးရှိသည်။ အိမ်ရှေ့ မိဖုရား လှိုင်ထိပ်ခေါင်တင်တွင် မြင်သော သားတော် ၂ ပါး၊ ကိုယ်လုပ်တော် ၅ဝ တွင် မြင်သည့် သားသမီးပေါင်း ၁ဝ၂၊ စုစုပေါင်း သား ၅၃၊ သမီး ၅၂။ မြေးယောက်ျား ၁၈၊ မြေးမိန်းမ ၂၁၊ သားသမီးမြေး ယောက်ျား မိန်းမ စုစုပေါင်း ၁၄၄ ရှိသည်။
အိမ်ရှေ့စံ ကနောင်မင်းသားနှင့် မင်းတုန်းမင်းတို့ ဆုံသောအခါ သားတော်၊တူတော်များအား စိတ်မချကြောင်း လျှောက်တင်တင်သောအခါ မင်းတုန်းမင်းက `အေး...မောင်ပုရေ...နောင်တော်ဘုရားကလည်း သီလ၀တို့ကို စိတ်မချဘူး။ မောင်ပုကလည်း မောင်ညိုတို့ကို ဂရုမစိုက်၊ သူတို့ကလည်း ထနောင်းပင်က မီးတကျည်ဆိုသလို လာကြလိမ့်ဦးမည်´ဟု မိန့်တော်မူသည်။

* မောင်ညိုဆိုသူမှာ ပန်းထိမ်းမင်းသားကို ဆိုလိုသည်။
* သီလ၀ဆိုသည်မှာ မြင်ကွန်းမင်းသားကို ဆိုလိုသည်။
* မောင်ပုဆိုသည်မှာ ကနောင်မင်းကို မင်းတုန်းမင်းက ငယ်စဉ်အခါက ညီပုလေးဟု ချစ်စနိုးခေါ်တွင်ရာမှ အရွယ်ရောက်လာသောအခါ မောင်ပု ဟုခေါ်ဆိုလေသည်။
မြင်ကွန်း မြင်းခုန်တိုင် အရေးအခင်းတွင် ကနောင်မင်းသား လုပ်ကြံခံရပြီး မင်းတုန်းမင်းတရားကြီးမှာလည်း လက်မတင်လေး လွတ်မြောက်ခဲ့သည်။ ကနောင်မင်းသားနှင့်အတူ မလွန်မင်းသား၊ စကုမင်းသား၊ ပြင်စည်မင်းသား သုံးပါးလည်း အသက်ဆုံးပါးရသည်။ အိမ်ရှေ့မင်းနှင့် မင်းသားများ လုပ်ကြံခံရသည်မှာ သက္ကရာဇ်၁၂၂၈-ခုနှစ်၊ ဒုတိယ၀ါဆိုလပြည့်ကျော်(၇)ရက်နေ့၊ ခရစ်နှစ် ၁၈၆၆-ခုနှစ်၊ သြဂုတ်လ(၂)ရက်၊ ကြာသပတေးနေ့တွင် ဖြစ်သည်။ သင်္ဂြိုဟ်သည်မှာ သက္ကရာဇ်၁၂၂၉-ခုနှစ်၊ နယုန်လဆန်း(၅)ရက်နေ့တွင် ဖြစ်ရာ (၁၁)လကြာမှ သင်္ဂြိုဟ်ခြင်း ဖြစ်သည်။ ကြားတွင် မြင်ကွန်း မြင်းခုန်တိုင် အရေးအခင်းနှင့် ပန်းထိမ်းမင်းသား အရေးအခင်းတို့ ဖြစ်ပေါ်နေ၍ အလောင်းများကို ခေါင်းသွင်းပြီး နန်းမြေဘုံသာ စံနန်းတော် ဆောင်မဘုံတွင် ခင်းကျင်းထားပုံရသည်။

သက္ကရာဇ်၁၂၂၉-ခုနှစ်၊ နယုန်လဆန်း(၅)ရက်နေ့တွင် နန်းမြေဘုံသာ စံနန်းတော် ဆောင်တော်မကို ဖျက်သိမ်း၍ အိမ်ရှေ့မင်းသင်္ဂြိုဟ်ရန် အုတ်ဂူ၊ ၎င်းအနီးတွင် မလွန်မင်းသား၊ စကုမင်းသား၊ ပြင်စည်မင်းသားတို့ကို သင်္ဂြိုဟ်ရန် အသီးသီး တန်းစီ၍ အုတ်ဂူတည်ပြီးလျှင်၊ ၎င်းဂူအရှေ့နှစ်တောင်အကွာတွင် စန္ဒာမုနိ ရုပ်ပွားတော်မြတ် ကိန်းဝပ်ပူဇော်ရန် အုတ်ပြသာဒ် ပြုလုပ်ထားသည်။ အနောက်ဘက်မှ စေတီကြီးကိုလည်း စန္ဒာမုနိ ရုပ်ပွားတော် ကိုစွဲ၍ စန္ဒာမုနိ ဘုရားဟုခေါ်လေသည်။ စေတီနှင့် ရုပ်ပွားထားရာ အုတ်ပြသာဒ်အကြားကား အိမ်ရှေ့မင်းနှင့် မင်းသားများ၏ အလောင်းများကို အုတ်ခုံပေါ်တွင် မြုတ်နှံထားသည်။ အိမ်ရှေ့မင်း၏ အုတ်ဂူကို အုတ်ပြသာဒ်ငယ် လုပ်ထားသည်။ ၎င်းအုတ်ပြသာဒ်ငယ်ကို စေတီနှင့် စန္ဒာမုနိ ရုပ်ပွားတော်မြတ် ဂန္ဓကုဋိတိုက်နှင့် အုတ်ရိုးသွယ်ဆက်ထားသေးသည်။ [3]

ကနောင်မင်းသား ရုပ်ကလာပ်အား မန္တလေးတောင် ခြေရင်းရှိ ဂူသွင်းသဂြိုလ်ခဲ့သည်။ ၁၉၈၈ စစ်အစိုးရလက်ထက်တွင် ကနောင်မင်းသား၏ အုတ်ဂူကို စန္ဒာမုနိစေတီ ဘုရားဝင်းအတွင်း ရွေ့ပြီး အခု မန္တလေးတောင်အသွား လမ်းဆုံမှာ အုတ်ဂူတည်ထားသည်။

ကနောင်မင်းအရိုးအိုးဂူတော်

ကနောင်မင်းအုတ်ဂူတော်ကျောက်စာ
ကိုးကား

1. ဒဂုန်ခင်ခင်လေး၏ မြင်ကွန်းညီအစ်ကိုနှင့် ပတိမ်းမင်းသားပုံကန်မှု (အဋ္ဌာရသ မဂ္ဂဇင်း၊ အမှတ်တစ်)
2. နေထွတ်၏ ‘မန္တလေးအဘိဓာန်’ စာအုပ်
3. ရွှေကိုင်းသား၏ နှစ်(၁၀၀)ပြည့် မန္တလေး

credit ti sr.Tin Maung Hlaing

Tuesday, May 29, 2018

Monday, May 14, 2018

စစ်သူကြီး​ မဟာဗန္ဓုလ

တောင်တန်းသာသနာပြု ဆရာတော် ဦးဥတ္တမသာရ

သမိုင်းထဲက မြန်မာ (၁) ကနောင်မင်းသား

စစ်သူကြီး မဟာဗန္ဓုလ